Zanter senger Kandheet gesäit de Rabih näischt méi. Hien ass en talentéierte Museker a wëll mat senger Grupp an Europa op Tour goen. Dofir brauch hien awer ee Pass, deen hien net accordéiert kritt, well seng Carte d'Identité gefälscht ass.
An der Suite stellt sech eraus, datt hien adoptéiert gouf. Vu wou hie kënnt, wie seng richteg Eltere sinn, si banal Froen, op déi de Rabih keng éierlech Äntwerten kritt. Seng perséinlech Geschicht ass mam libanesesche Krich tëscht 1975 a 1990 verbonnen. Eng Zäit déi, wéi se an "Tramontane" subtil duergestallt gëtt, vill Wonnen a Ligen hannerlooss huet.
Sozialen Drama a Mysterie-Thriller
Dëst ass dem Vatche Boulghourjian säin éischte Long-Metrage an en ass nawell zolidd veraarbecht. Et ass net ëmsoss, datt en d'lescht Joer zu Cannes während der Semaine de la Critique gelaf ass.
"Tramontane" ass ee sozialen Drama an existenzielle Mystery-Thriller, an deem de libanesesche Regisseur eng enigmatesch Stëmmung schaaft, déi sech lues ofspillt. Trotzdem bréngt hien et fäerdeg de Spectateur déi ganzen Zäit ze paken.
All Charakter, deen de Rabih op senger Sich no senger Vergaangenheet begéint, hannerléisst eng aner Geschicht vu sengen Originnen. Et mierkt een, datt him villes virenthale gëtt an datt d'Populatioun den Akte vum Krich mat gestreckte Wourechten oder carrement Lige probéiert aus dem Wee ze goen.
Wonnerbare Soundtrack
"Tramontane" iwwerzeegt och duerch déi staark Performance vum Barakat Jabbour an der Haaptroll, dee säi Personnage onopdrénglech zum Liewe bréngt. Säi musikalescht Talent dréit och zu engem wonnerbare Soundtrack bäi. Musikalesch Interluden a Live-Performancen, déi den Toun vum Film ergänzen, wann net esouguer duerch d'Wierder diktéieren.
Mat Zäite wierken d'Biller ze däischter. Och wann een dëst als cinematographesche Feeler empfanne kéint, spiert een, datt de Vatche Boulghourjian den Zuschauer bewosst am Däischtere léisst. Grad ewéi den Haaptprotagonist selwer, dee sech duerch d'Ligë probéiert ze kämpfen.
E meditatiivt Wierk
D'Aart a Weis an deem déi politesch, sozial an och perséinlech Problemer am Film ugepaakt ginn, loosse genuch Fräiraum, fir Froen ze stellen an fir eegen Interpretatiounen. Eng iwwerflächlech moralesch Léier gëtt engem net opgedrängt.
"Tramontane" ass ee meditatiivt Wierk, dat duerch eng assuréiert Kompositioun d'Theme vun der perséinlecher a kollektiver Identitéit am géigewäertege Libanon mat Takt ënnersicht.