Theater TNL: "Superspreader" mam Peter Lohmeyer

Den Owend steet eng leschte Kéier de Peter Lohmeyer am TNL op der Bün. Den däitsche Schauspiller, deen ënner anerem duerch de Film "Das Wunder von Bern" Bekanntheet erreecht huet, steet hei am Albert Ostermaier sengem Monodrama "Superspreader" op der Bün, an deem dem Kapitalismus ënner anerem pandemesch Zich ënnerstallt ginn.

Frédéric Braun / tt

Theaterkritik Peter Lohmeyer am "Superspreader"
Foto: TNL

D'Bünebild ass einfach gehalen. Lénks en Dësch an e Stull, riets e Kleederbigel, nieft oppe Valissen. Nach wärend deem d'Leit Plaz huelen an de Sall däischter gëtt, gesäit een an der Mëtt en Här op de Réck, dee mat Isoléierband e rechteckegt Stéck Kraftpabeier un der Mauer festmécht op dat hien elo gläich eng Silhouette mole wäert. Et ass eng perséinlech Ugewunnecht, déi de Schauspiller a Moler Peter Lohmeyer hei gläich am Ufank an d'Stéck afléisse léisst. Ofgestouss vun an der Reegel fade Biller déi d'Hotelszëmmeren alt esou dekoréieren, hätt hien iergendwann domadder ugefaangen se zouzepechen a schliisslech z'iwwermolen, wéi de Schauspiller a Moler eis spéider verréit.

Déi personifizéiert Finanzindustrie

Iwwerhaapt ass de Peter Lohmeyer, deen deenen allermeeschten aus Filmer wéi "Das Wunder von Bern" an awer och "Deep Frozen" vum Andy Bausch bekannt ass, deejéinegen deen eist Stéck "Superspreader" vum Münchener Schrëftsteller an Theaterauteur Albert Ostermaier eréischt esou richteg envisagéiere léist. Et ass hien, de fréieren Dominik Graf Schauspiller, deen een dee gutt annerhallef Stonn laange Monolog, deen dem Publikum elo gläich zougemutt gëtt duerchstoen a reflektéieren hëlleft a wéi Erënnerung dorunner ass, datt et hei em méi muss goen, wéi op den éischte Bléck ugeholl.

Marcel, wéilt hie sech nennen, gëtt de Mann op der Bün an enger Ouverture déi um Melville säi Moby Dick erënnert bekannt - deen Numm géif him einfach gefalen. Firwat hie sech da selwer e Numm gi muss, deen op de Krichsgott Mars verweist a firwat hien de Wonsch verspiert keng Wuerzelen ze hunn, dat gëtt een eréischt um Enn vum Stéck gewuer.

De Marcel wier Finanzberoder, frequent Flyer an ausserdeem en High Performer verréit de Klappentext - déi personifizéiert Finanzindustrie eben. Op senge sëllege Reese ronderëm d'Welt hätt hien dofir gesuergt, esouvill gëtt kloer, Entreprisen dovunner ze iwwerzeegen hir sougenannte "Minderleister" aus dem Betrib ze werfen, an sech op dësem Wee "ze optimiséieren", woubäi dat wier jo bekannt d'Saachen eréischt dann esou richteg de Bierg erof géingen, mengt de Marcel selbstsécher.

Kichepsychologie iwwer d'Pandemie

Fakt ass datt de Virus - wann och wéi de Marcel änlech effizient - hien elo zwéngt a sengem Hotelszëmmer ze bleiwen. Eng Zoumuddung fir deen zimmlech karikatural gerodene Yuppie, dee gäre vu sech behaapt upassungs- a wandlungsfäeg ze sinn. Opgereegt bëselt hien a sengem Zëmmer hin- an hir, mol ugedoen, mol ausgedoen, am Jogging a schliisslech esouguer am Kostüm, monologéiert, spruddelt nëmmen esou vu Wierder a rotéiert monoman ronderëm d'Erënnerung vun enger duerch emotional Vernoléissegung gepräägte Kandheet, aus där hien offensichtlech seng ganz Energie zitt, fir aneren ze schueden.

Et feelt dem gudde Mann kloer un Ausgang, dofir och wuel dee verbale Stullgank, deen den Zuschauer ouni Filter déi nächst annerhallef Stonn erdroe muss. Et ass kee liichten Text deen den Albert Ostermaier sengem Schauspiller awer och dem Zuschauer zoumutt: scheinbar onendlech, ermiddend, mat Momenter domm a blöd, léist hie säi Personnage a mat enger gudder Portioun Kichepsychologie ausgestatt, virun alle Blécker sech ausbreeden - super ausbreeden, wéi den zweedeitegen Titel vum Stéck et ukënnegt. Senger existenzieller Nichtegkeet kann de Marcel näischt aneres entgéint stellen, wéi eng impotent Roserei.

Beim Zuschauer stellt sech iergendwann e Sättegungsgefill an. Wëll een dat alles esou genee wëssen, an esou brooch zerwéiert kréien? Eigentlech net. An dach huet sech den Albert Ostermaier grad fir dës Form entscheet. Offensichtlech vertraut hien op dem Publikum säi Bullshit-Detektor, deen och nom Ausgang vun den amerikanesche Walen nach ëmmer funktionéiere sollt. Dat Wesentlecht bei dësem Theaterstéck fënnt net op der Bün, mee beim Zuschauer statt. Deementspriechend kann d'Uweisung nëmmen déi sinn, eis nees un d'Nolauschteren ze maachen, un Nodenken duerch dat eleng déi batter néideg Aktualiséierung vun eiser komfortabeler Positioun an enger Gesellschaft, déi auserneen drift, an an enger Welt déi soss ënnergeet, méiglech gëtt.

An der Mediathéik:

Kultur / / Frédéric Braun
Lauschteren

Méi zum Thema

Careless Crime Kompetitioun
Luxfilmfest

Rekonstitutioun? Transpositioun? Oder einfach nëmme Konfusioun? Mat engem Spill mat der Realitéit an der Illusioun stellt den iranesche Film ''Careless crime" de Spectateur op d'Prouf.

Christian Berkel
Christian Berkel

De Christian Berkel stoung joerzéngtelaang virun der Kamera a war besonnesch beléift als "Der Kriminalist" Mat 61 huet hien elo seng zwee éischt Bicher geschriwwen, an deenen hien d'Geschicht vu senge Virfare literaresch verschafft.

151685058_10159652709061424_8682610106750502554_o.jpg
Danz

All drëtten Dag vum Mount kann een zu Bouneweg an der Banannefabrik Danzstéck gesinn. Beim 3 Du Trois nächste Mëttwoch geet et ëm d'Ausmoosse vun engem Raum, an deem kënschtlerescht Schafe kann zur Sproch kommen.

Net verpassen

  • Offre d'emploi: Journaliste-présentateur/trice

    radio 100,7

    L'Établissement de Radiodiffusion Socioculturelle, opérateur de la radio de service public radio 100,7, recherche Un/e Journaliste-présentateur/trice sous contrat à durée indéterminée et à tâche complète (40h/semaine).

Programm

  • Virum Dag vu 6 bis 10

  • On air

    Sot emol - Laura Miller

  • Iwwer Mëtteg vun 11 bis 2

  • Resonanzen

  • Am Nomëtteg vun 3 bis 6

Dossieren

  • Olympesch Spiller 2021

    D'Olympesch Spiller fannen, mat enger Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen