Webinar
Vu Lego bis Robotik - Spilles Léiere fir d’Zukunft
87 min
Robotik an digital Funktioune sinn aus eisem Alldag net méi ewechzedenken. Dacks mierke mir mol guer net, wou si agesat ginn, profitéieren awer dovun.
Wat kann e Roboter iwwerhaapt? Kann en och selwer léieren? A wat brauche jonk Leit fir mat der Vitess vun der Entwécklung am digitale Beräich mat ze wuessen?
Wie wëllt verstoen, wéi digital Funktiounen opgebaut sinn, ass besser drun, wann e weess, wéi automatiséiert Prozesser funktionéieren. Dat kann ee scho vu Klengem un, an och analog, no an no léieren.
Fir d'Verstoe vun esou Prozesser ze fërdere ginn et mëttlerweil eng ganz Rei Méiglechkeeten am Enseignement: Robotik-Concourse wéi d'Junior Robot Challenge an d'First Lego League an der Grondschoul, Coding, wat ugepasst un de Cycle Aktivitéite virschléit, fir datt Kanner z. B. verstinn, fir wat e Roboter e Befeel brauch, an dee Befeel muss prezis sinn. An den éischte Joren am Lycée gëtt dat sougenannt computational thinking am Fach Digital Sciences erweidert: hei geet et vun der Definitioun vun engem Roboter iwwer d'Programmatioun, d'Limitten a méiglech Gefore bis bei Chatbots. Esou kënnen d'Schüler a Schülerinnen um Enn net nëmmen automatiséiert an digital Apparater an Uwendunge benotzen, mee verstinn och, wéi se opgebaut sinn a funktionéieren. Wie sech a senger weiderer schoulescher Entwécklung fir e Beruff am Beräich vun der Infotronik, den erneierbaren Energien oder zum Beispill der Robotik interesséiert, huet d'Méiglechkeet säin Ofschloss an de Smart Technologies ze maachen.
Iwwer den Opbau vun dësem Wëssen, d'Entwéckele vun den néidege Kompetenzen an de Wee vum Verstoe vu komplexe Prozesser an der Robotik an an den digitale Wëssenschafte geet rieds am Webinar. Mat Beispiller vum Terrain a gelieften Erfarunge vu Schüler a Schülerinnen a vu Léierpersonal kritt een en Iwwerbléck iwwer d'Offer, déi besteet, d'Formatiounen, déi gebuede ginn, an d'Wichtegkeet souwéi den Notze vun dëse Kompetenzen, déi nieft de 4 K (Kollaboratioun, Kreativitéit, kritescht Denken a Kommunikatioun) zu deene wichtege vum 21. Joerhonnert gehéieren.
Et diskutéieren:
Jill Aniset, Institutrice spécialisée en compétences numériques, IFEN
Pascal Hoffmann, Schoulmeeschter, Coordinateur Junior Robot Challenge, SCRIPT
Claude Loullingen, Professer fir Smart Technologies am LGK, Expert LuxSkills an der Robot Systems Integration
Luc Schreiner, Franséischprofesser am LTL, Aarbechtsgrupp Digital Sciences SCRIPT
Moderatioun: Natasha Ehrmann
Weider Aussoen zum Theema a Méiglechkeet wärend der Live-Emissioun Froen iwwer fro@webinar.lu oder d'WhatsApp 621 44 00 44
Episoden
Lycée? Spéidere Beruff? Talentsich?
Äntwerte ginn et op der Schoulfoire an an dëser Diskussioun iwwer d’Theema vun der Orientatioun an d’Méiglechkeete vum Bildungssystem. An Zesummenaarbecht mam Script
Kultur an der Schoul - eng Konscht fir sech?
Wat ass de Stellewäert vun der Kultur an eiser Schoul? Ass genuch kreatiivt Schaffen um Stonneplang? Oder misst ee Kultur als Wäert méi fachiwwergräifend an d’Léierpläng afléisse loossen? An Zesummenaarbecht mam Script
Vu Lego bis Robotik - Spilles Léiere fir d’Zukunft
Iwwer d'Entwéckele vun den néidege Kompetenzen an de Wee vum Verstoe vu komplexe Prozesser an der Robotik an an den digitale Wëssenschafte geet rieds am Webinar.
Deng Stëmm zielt! Participatioun vu Kanner a Jonker
Wéi ka Participatioun an der formaler an an der informeller Bildung zu Lëtzebuerg, souwuel an wéi baussent der Schoul gefërdert ginn?
Alphabetiséierung op Franséisch
"zesumme wuessen!" e Pilotprojet, deen a véier Schoulen ugelaf ass. Firwat ass eng Alphabetiséierung, sou no wéi méiglech un der staarker Sprooch vum Kand, wichteg?
Tabula Rasa mam Tabu - schwiereg Theemen an der Grondschoul
An Zesummenaarbecht mam SCRIPT an dem Institut de formation de l'Éducation nationale (IFEN) an och live iwwer Video op der Internetsäit www.100komma7.lu gestreamt
Den Ëmgang ma AI an der Schoul
Wat ass Artifiziell Intelligenz? Wat musse Schülerinnen a Schüler iwwer de Fonctionnement vun AI wëssen? Wat fir e Basiswësse muss een hunn?
Kannerrechter: Participatioun, Schutz a Fërderung
Eng Live-Diskussioun vum SCRIPT a radio 100,7 mat Experten a Jonken. Diskutéiert mat: fro@webinar.lu; WhatsApp-Message 621 44 00 44.
Den Entrepreneursgeescht an der Educatioun
Kommunikativ, kollaborativ, kreativ a kritesch denken - den Entrepreneursgeescht an der Educatioun.
Léieren dobaussen - D'Ëmwelt als Unterrechtsmaterial
Iwwer d'Méiglechkeeten, déi et fir en Unterrecht ausserhalb vum Klassesall ginn a wéi ee sech am beschten uleet, fir op dee Wee ze goen.
Orientatioun an der Educatioun
Déi éischt national Schoulfoire ass vum 2.-4.5. Experte spanen am Virfeld e grousse Bou vun der Schoulorientatioun an der Grondschoul, am Secondaire an an der Beruffsausbildung.
D'Erausfuerderunge vun der Alphabetiséierung zu Lëtzebuerg
Traditionell geschitt d'Alphabetiséierung an der Lëtzebuerger Schoul op Däitsch: heirëm stelle sech awer vill Froen, déi am Mëttelpunkt vun dësem Webinar stinn.
Museksunterrecht am Enseignement
D'Reform vum Museksunterrecht soll fir d'Rentrée 2022 gräifen an eng vun den Haaptnouvellen ass, datt den Enseignement musical vun deem Ament u fir Kanner gratis gëtt.
ADHS
Eng Diagnos, keng Meenung! Wisou eng Fréierkennung wichteg ass, an den ADHS een dat ganzt Liewe laang begleet.
Franséisch an der Schoul
Quasi zanter Lëtzebuerg existéiert, gëtt Franséisch am Schoulsystem enseignéiert. A genee esou laang gëtt d'Sprooch vu villen als schwéier ze léieren an ze schwätzen empfonnt.
