De Weekend probéiert sech d'Fotografin fir hir Famill fräizehalen. Heiansdo kënnt et dann och vir, datt si vun hiren zwee Kanner d'Moiesiesse preparéiert kritt. D'Tania Traversini muss dann aus der Kiche bleiwen, bis d'Iesse prett ass.
Wa si hire perfekte Weekend kéint als Foto festhalen, wat wier dann dorobber ze gesinn?
"Meng Famill, meng Déieren, Natur, Musek, well mir gären danzen, gemittlech all zesummen am Gaart mat engem Brunch mat engem gudde Buch bei Sonneschäin."
Zanter 2019 huet sech déi fréier Spillschoulsjoffer selbststänneg gemaach. Et wier einfach de Moment dofir gewiescht, esou d'Tania Traversini. Hir géifen awer nach ganz vill aner Iddien am Kapp schlummeren. Geschwë lancéiert si hiren neie Projet Flora Your Essence. Bei Fotoshootinge mat Frae wier der Tania Traversini opgefall, datt sech der vill vun hinnen an hirem Kierper net wuel spieren.
"Si wëssen deelweis net méi, wéi si sech sollen upaken oder hu Problemer domat, sech op de Fotoen ze gesinn."
Dobäi wier jiddweree schéin, wéi en ass, seet d'Fotografin.
Déi Schéinheet vun all eenzel Famill ass dat, wat hir un hirem Beruff och esou gefält. Fir si wieren et och net einfach Clienten, esou d'Tania Traversini.
"Et ass eng Famill, déi bei mech kënnt. All Famill huet hir eege Geschicht. Heiansdo ass se méi schéin, heiansdo sinn et och traureg Geschichten."
D'Fotografin wier immens dankbar, déi Momenter, déi de Famillen an hirem Liewen esou wichteg sinn, kënne festzehalen.
