Viru Kuerzem huet si hiert éischt Buch geschriwwen an et selwer editéiert. Et ass eng Aart Zäitdokument, well an der fiktiver Geschicht vill reell Evenementer an Elementer mat agebaut sinn. Et geet ëm d'Noémie, déi hirer Duechter Bréiwer fir d'Zukunft schreift. Si hält hir Suergen a Freed fest, schreift iwwer d'Covid-Pandemie, de Krich an der Ukrain an d'Angscht virun der Klima Katastroph.
"Et ass mir drëms gaange fir Saachen aus eisem Alldag festzehalen, déi komplex sinn, schéi komplizéiert sinn a tendenziell séier laanscht een zéien. Saachen, déi mech selwer awer laang beschäftegen."
Vill Lieser:innen hätten der Narmina Pasqualoni gesot, datt si sech am Buch erëm erkannt hunn a sech mat der Haaptprotagonistin identifizéiere kéinten. Et wier och eng schéin Erfarung sech mat de Suergen an Ängschten net eleng ze fillen. Vill Eltere wieren dagdeeglech domat beschäftegt, mat den Erausfuerderungen am Alldag eens ze ginn an anerersäits hirem Kand oder hire Kanner eng schéin an onbeschwéiert Kandheet a liewenswäert Zukunft ze garantéieren.
Säin éischt Buch erauszebréngen an dann och an den Hänn ze hale wier "ganz wonnerbar", seet d'Schrëftstellerin.
